لماذا غادر محمد عيد باستثماراته خارج الاردن ؟!

جفرا نيوز - جفرا نيوز -ياسر النسور  سؤال طرحه الاعلامي عامر الصمادي على برنامجه "يا طير" بنبرة صوته الدافئه , الهادئه , لكن سؤاله أثار ضجيجا هائلا كضجيج أول انشطار ذري في صحراء الاموغوردو كان قد سمعه بشر لأول مرة في حياتهم !! صوت له دويّ بمئة ألف سؤال وسؤال ؟؟ !! 

لماذا يغادرنا المستثمرون ؟ لماذا يهربون من البيئة الخصبه , المستقطبه , المليئه بالحوافز والتشجيعات والاعفاءات حسب ما تعلن مؤسسة تشجيع الاستثمار حين تشجّع وتحفز وترسم لنا تلك الصورة البديعه " كما أمليت عليها " !!!؟ ولماذا تصاب بالبكم حين يفر المستثمر من الاردن وبيئته واعفاءاته فرار الهارب من أنياب وبراثن المفترس !!!

لماذا ؟؟؟ لا نقدر ان نجيب على أي منها , وان كان بامكاننا تناول بضعها لمحاولة معرفة الخلل , او بادنى الحدود الحصول على اجابة مقنعه , جريئه من أحد المختصين .

فكّرتْ !!؟ ألا يجدر بنا مكافحة ومحاسبة وتعليق مشانق " مفضّضي الاستثمارات من وطننا " !؟ الا يمكن لنا ان نعتبرهم فسده وآكلين لمقدرات الوطن تماما كمن مد يده الى المال العام وفرّ بمئات الملايين ؟!

سيرد البعض " لا يا رجل لا تبالغ ! أيستوي هذا مع ذاك "؟؟ فأقول نعم يا سيداتي وسادتي "يستوي ونص " اذا علمنا التالي من المشاهد اللاحقه :

مشهد 1
- اذا كان موظف نظيف اليد عفيف النفس مجدّ في عمله , ولكن نخوته وجاهليته قد أعمته بأن يستجيب لاتصال فلان بن فلان , او صاحب اللقب المنتهي بالدولة او المعالي او السعاده والذي يمرّر للموظف المسكين ما يلي : " فلان مقدّم مشروع عندكو , وقفو من عندك , خذلك اجازه يومين , اقولك اخفي الملف , أو اسمع : دير ميه عالكمبيوتر خليه ينحرق هو والملفات اللي بيه " . هنا وبدون تفكير !! تأخذ الحميه فلان الساذج ويهب لتلبية طلب فلان لأنو دبر مقعد جامعه بدون مكرمه لابن أخوه قاسم الذي يخدم في العسكريه ومش قادر يحط ابنو بجامعه ولا قادر يدفع قسطو " .

مشهد 2
- اذا كان موظف به كل صفات الشرف والعفّه , وماشا الله عليه وحواليه , مدير دائرة او قسم كبير ومعاملة المستثمر مارّه عليه هيك هيك . اخونا لا سرق ولا زوّر ولا أفسد بأي واسطه او محسوبيه !! هنا يتسائل البعض " اياهم اللي سألوني اول مره " : طب هه !! هيك بتقول انو نظيف !! وين مشكلته هاظ كمان ؟؟" . فأرد وابتسامة طفيفه , رقيقه على وحيّا وجهي : مشكلته يا احبتي بأنه صحيح مدير لدائرة او قسم من أكبر دوائر المؤسسه او الوزاره , بس عندو مشكله صغيره هالقد " واشير الى راس اصبعي الخنصر " . مشكلتو يا ساده انو خريج كلية الآداب , وتعيّن كما تعيّن الآف منا . بس مشكلتو انو لا بيقرا انجليزي , ولا بيفهم بالتجاره ولا الاستثمار !! يعني الزلمه ترفع تلقائي عدة سنوات !! طب كيف بدو يتفاهم مع المستثمر ويقتنع انو هاض الزلمه جاي وعندو رؤيا ! هدف ! خطه ! ودراسة جدوى !!؟

عطوفته بيقوم وبيمسك الملف اللي جايبه المستثمر وبيقلبه يمين شمال – فوق حادر, ويسرح وهوينظر لمخططات ودراسات اكتواريه , ومعلومات احصائيه ويقول بينه وبين نفسه : هاض المهوّي بدو يكب مصاريه بالتراب !! ويصحو فجأه ويقول للمستثمر : اتركلي ياه " قصدو الملف " وانا رح ادرسه واطرحه ع مجلس معاليق !! عفوا معاليه . وهنا نكتشف ان ذهن المدير النظيف العفيف ابيض اليد قد طار الى البيت والمطبخ تحديدا " ! طبعا ما هو العيد الماضي جارهم ابو عطيه بعثلهم المعلاق ! ومن هظاك اليوم محطوط بالفريزر واليوم كونو الخميس اجا وقتو وطاب الموت .


مشهد 3
- اذا كان الموظف ملعون حرسه , بيلعب بالبيضه والحجر ! والفكرة عجبتو وبدو يطبقها بحذافيرها ! وينظر شزرا" للمستثمر ابو الملف اياه ومع ذلك بيسولف مع حالو : آآآآآآه هاظ الاخ جاي يساوي ملايين ع حسابي وحساب المواطن الغلبان ؟؟! طب ليش ما اساوي المشروع أنا ؟؟ وانا مالني ؟؟ هيني الحمد لله كامل مكمّل والكمال لله , آه ليش لأ !!؟ وأصلا"عندي علاقاتي , صحيح اني منتوف وطفران وما حيلتي الا الراتب اللي ما بيصمد ل عشره الشهر بس بتتدبر . أقوللك !! بكرا بدب عالبنك وبوخذ كمبياله وبتصل بأبو فلان ( مليان هاض ) وبقولّو عن المشروع وبنسجلو احنا الاثنين بس النا , وبنتبغدد بالمصاري بغدده وأول شي رح اسويه من أول مليون أرباح , طاسات جداد وعجال جداد للدايو تبعتي !! آآآه لازم اصير ارش واتشبرق , هو الواحد بيعيش كمن مره ؟ . بس هاظ كيف بدي اخلص منو ؟؟؟ ويتوجه بالحديث للمستثمر او مندوبه ويقول : شوف خيّوه ! ترى سولافتك مو سهله وصعبه صعبه كثير . أول اشي بدك تروح على المحافظه وتشوف عطوفته وتشرحلو الوضع , اذا اقتنع!!بوجهك من عندو طوالي ع ريّس البلديه , آآآه الأمور عندنا منظمة شو بتفكر !!؟ , ريّس البلديه بيشرحلك عليها , بتيجي عندي مره ثانيه اشوفك , هاض اذا كنت مداوم او ما كنت مشغول بلجنه محليه او لوائيه او دوليه . ساعتها , بأشّرلك عالطلب , ب تطيح بتدفع الرسوم مشان تعرض عاللجنه المختصه الشهر الجاي !! هاااا شو بتفكر ؟؟ الاستثمار عنا بالبلد زي الرز ترى , بتفكر حالك المستثمر الوحيد اللي بنشوفه ؟؟ لا خيّوه !! اصحى !! احنا هون بتشجيع الاستثمار عنّا منافسه شديده , وبعدييييين لمّا تنعرض عاللجنه , بترجع عند عطوفة المحافظ مشان ... ,!!!! (فجأه ينهض المستثمر وبيشتل الملف من قدام أخونا شتل, ويخرج بسرعة البرق وهو لا يتمتم الا ب " : $%&#@$#@!!%*))*^%%$#^%&)!#@$ !!!! )


آخر حاله نتطرق لها
مشهد 4

- اذا كان الموظف كبير !! كثييير كبير !! كثيير كثيير يعني , ووصلو ملف المستثمر الذي تنهنه على اعتاب داوئرنا ومؤسساتنا ومو حازّ ببالو غير انو : " يا عمّي مش قاعد بطلب معونه !! انا جاي ّ استثمر !!!؟ .
نعود الى الملف ع مكتب فلان الكبير كثير لنجد انه وبمجرد فتحه للملف يرى اسم المستثمر !! وهنا تكون الصاعقه !! شوووووووو !!؟ معقوووول !!؟ " يصرخ الموظف الكبير !!! هاض بدو يساوي مشروع هون بالبلد وانا بتنفس !!؟ لا والله ما بيصير , علي بالحرام ما بيشمّو , اعوذ بالله , هي البلد ناقصه قوى شد عكسي ؟! هو احنا ناقصين ناس تعركس مسيرتنا ؟؟! لا يمكن .!! ابدا" !!! مستحييييييل !!!
- يتبين يا أحبتنا , أن "المأفون " عفوا الموظف الكبييير جدا له ثأر بايت عند المستثمر , اساسه ان والد المستثمر وعمامو واخوانه كانو واقفين ضد المأفون بالانتخابات . مش مضاضدة ولاد عم , لأ !!بس لأنهم عارفين دودهم اللي ببطنهم وعارفين انو هاض الشيء المأفون ان استلم منصب كبير فيا ويل البلد .
عديد من الافتراضات ولكن بقي سؤالنا لم تتم الاجابه عليه !! لماذا غادر آلآف محمد عيد الاردن باستثماراتهم خارجا" ؟؟؟؟؟؟؟؟؟