مشاكلي لا تنتهي

جفرا نيوز  -انا رجل عمري 42 سنة متزوج من 16 سنة ... وعلى مبدأ انو فش حد كامل وانو الزوج او الزوجة لازم يتقبل الطرف الثاني وبرغم اي شيء كنت وما زلت دائما احكي عن زوجتي قدام الناس ولأهلي انها اصيلة وكويسة وما في مثلها بس مش هاي هي الحقيقة ... انا اللي كنت اتنازل دائما وامشي الايام

انا مش ملاك عندي اخطاء عشان هيك بدي اعترف عن اخطائي معها قبل لأحكي مشكلتي

اول زواجي اخطأت معها بالتعامل على قد ما كانوا المجتمع والاهل يعلمونا انو افرض شخصيتك على مرتك ولا تعطيها مجال ... بس ما عمري مديت ايدي عليها كنت صغير وقتها وما بعرف اتصرف وكنت معها برضو كويس والمواقف معدودة لكنها حتى اليوم حاقدة علي ومش قادرة تسامحني رغم انها كانت فترة مؤقتة وطول السنوات اللي حاولت اراضيها فيها لكن عند اول مشكلة بتتذكر كل المواقف القديمة

بعد ما كبرت شوي تغيرت معها كثير واعطيتها كل الاهتمام والحرية والدلال وشو ما بدها ما برفضلها طلب والي على هاي الحال سنوات طويلة

اذا بنتزاعل انا براضيها

لكن هي ناشفة معي كثير

قلت مش مشكلة لكن الآن الوضع صار لا يطاق

زوجتي مهملة جدا جدا جدا

بروح من شغلي اخر النهار .. لا اكل جاهز ولا بيت نظيف

البيت فوضى عارمة

صرت اشتري اواعي عشان البس لأنو كل اشي ضايع بالبيت

لا متابعة لدراسة الاولاد

24 ساعة عالتلفون او مع الجارات

لا يوجد اي وقت الي

لا يوجد اي حنية مع الولاد

واذا بنتقدها بتصير تعيط وما بتتحملني وبتتشنج

والاشي اللي كثير مدايقني وعامل غصة بقلبي انها ما بتصلي .. بشعر لا امان معها وموقفنا قدام الولاد سيء من هالناحية

مش عارف شو اعمل معها

اذا بواجهها ما بتتحمل ممكن تنهار

اطلقها برضو مش قادر عشان الاولاد

اتركها على راحتها مش قادر صار الوضع لا يحتمل