الاردنيون ٢٤ ساعة على السوشال ميديا

جفرا نيوز - جفرا نيوز - الاردنيون متى بشتغلوا؟ متى بنتجوا؟ ٢٤ ساعة على السوشال ميديا! تنظير ونقد وهجوم وخطاب كراهية وتشاؤم وتشكيك واتهامات وتخوين وشتائم ونميمة !! الكل بنتقد والكل بزاود بالاخلاق والنزاهة والشرف والوطنية ! والكل بحلل والكل بفسر والكل بفترض والكل بكتب !؟ طيب مين بده يقرأ ؟ مش تاركين حدا من شرنا لا مسؤولين ولا سياسيين ولا فنانين ولا رجال دين ولا مواطنين عاديين !حتى ضيوف البلد صاروا يتعوذوا من الشيطان قبل ما يفكروا يقبلوا دعوة لزيارة الاردن ! كلنا بننتقد المسؤول اذا بخالف القانون وكلنا بندوس على القانون برجلنا عشان مصلحتنا! كلنا ضد الواسطة وضد المحسوبية وكلنا بنبوس الايادي عشان نتوسط لمصلحة خاصة ! كلنا بنكره ( اسرائيل) وكلنا بنردد وبنصدق تغريدات صهيوني مضمونها اسخف من انه طفل رضيع يصدقها بس لانه بهاجم النظام صار مصدق عنا ! كلنا بنكره العنف والاحتماء بالعشيرة وكلنا بنصيح يا لثارات عشيرتنا عند اقرب مشكلة بتواجهنا ! كلنا بنهاجم عبيد الكراسي والمناصب وكلنا بنقطع بعض على اي منصب حتى لو مدير جروب واتس اب ! كلنا انبياء على السوشال ميديا وكلنا شياطين ومنافقين على ارض الواقع !! ما عجبكم حكي فيصل الفايز عن اخلاق الاردنيين ؟ والله ما كذب بحرف بس هاي دكتاتورية الجماهير اللي بتقاوم أي انتقاد ضدها !! ليش الاقتصاد منهار؟ ليش الخدمات متردية؟ ليش التعليم متراجع؟ ليش الجرائم مرتفعة؟ ليش الاخلاق بالحضيض؟؟اطلعوا بالمراي وواجهوا حقيقتكم وانفصامكم بتعرفوا الجواب ! اشتغلوا وانتجوا وتصالحوا مع انفسكم وكفوا عن الكراهية المعششة بقلوبكم وتفرغوا شوي لتربية ابناءكم وكونوا قدوة حسنة الهم !! كرهتونا بالسوشال ميديا وبالصحافة وبالسياسة وبالدين وبالاردن وبالحياة كلها !!