لماذا يرفض بعض الشبان الزواج من المرأة المطلقة ويقبل بالاجنبية؟
جفرا نيوز- يلي أنا بدي أستفسر عنه هو إنه ليش بعض الشباب العزابيين برفضوا الزواج من المطلقة بالرغم من إنهم عارفين إنها كانت مع واحد بالحلال مش بالحرام بل حتى منهم هذول الشباب بأنفسهم ممكن يكون آسمهم عزابيين بس بالإسم فقط لا غير ، يعني عاملين السبعة و ذمتها بالحرام ، و بحرموا الحلال للأنثى ، ليش الذكورية بتسري بدمهم مش عارفة أنا عنهم ليش هلقد بحبوا الظلم ؟
و بل حتى بوصفوها بالمستعملة و كإنها مجرد سلعة ، و هالكلام هذا عنها بحد ذاته مهين جدآ و مش حلو بحقها تنوصف هالوصف هذا بدون سبب ، أما بالمقابل الشي المؤسف جدآ جدآ إنهم هذول الشباب بأنفسهم برضوا على حالهم يتزوجوا من أجنبية ماضيها أغبر ، و من المعروف إنها قلما تكون وحدة أجنبية ما زالت آنسة ، بل حتى بعتبروها مش طبيعية هناك إذا إنها كانت آنسة بعتبروها مريضة أو عندها برود جنسي أو كذا ، فكيف برضوا عحالهم يهينوا أمهم و أختهم و بنتهم العربية و يغفروا للغربية أخطائها ؟؟!؟!؟
سؤال بطرح نفسه كيف المجتمع الذكوري نشأ و مين السبب بهالظلم و اللؤم مع الأنثى العربية ؟!؟؟!
أنا الشي يلي قهرني بصراحة إنه إبن جيرانا كان بدوياني
بس أمه الكبيرة بالسن رفضتني لأجل إني مطلقة و هو عزابي و بنفس الوقت هيو خطب وحدة أوكرانية و هيها ما بتتحجب و بتلبس قصير و هالشي مش موجود عنا ببيئتنا إنها الوحدة تمشي مع جوزها و تقصدر بالشارع و هي لابسة تنورة قصيرة ، و كإنه بعرض مفاتن زوجته الأجنبية أمام الله و خلقه و بعذرها و أهله الله لا يوفقهم بعذروها رغم معرفتهم إنه أنا أشرف منها ، يا جماعة أنا بعرف إنه ربي رحمني منهم و اختارلي الأفضل يلي هو بيت أهلي افضل بكثير من بيت طليقي ، بس والله العظيم الشي يلي بحرق القلب إنك تشوف إنه كثير منهم بفكروا بنفس الطريقة الشرقية هايي إنهم برفضوا العزابي يتزوج من مطلقة بالرغم من إنها ممكن تكون أفضل و أشرف منه بأضعاف المرات ، و بالمقابل بعذوروا الأجنبية و بقولوا عادي بنربيها و بنخليها تتحجب و تلتزم أكثر من العربية بنفسها ، و بنغروا فيها بل حتى سلبياتها بشوفوها إيجابيات
كيف بنعمي على ضوهم مش فاهمة أنا ...
هل يا ترى جمال الأجنبية بغنيك عن أخلاقها أو بتتخلى عن عاداتك و تقاليدك لأجلها ؟
هل يا ترى جنسية الأجنبية بتغنيك عن مبادئك ؟
هل يا ترى المطلقة بطلت تصلح للزواج بنظر الشب الأعزب ؟ بالرغم من إنه المجتمع كامل بعرف إنها المرأة هي يلي بالعادة بتكون مظلومة بالطلاق بهالمجتمع الذكوري .
كلامي بخاطب العقول الراقية فقط لا غير .
و بعتذر على الإطالة .