اعويّـر و إصويّـر والحكومة

جفرا نيوز - جفرا نيوز - خاص  على رصيف احد مقاهي عمان يجلس الشقيقان (اعويّر) و (صويّر) كما تعودا في ساعة الظهيرة يرتشفان القهوة ويناقشان احوال السوق مع انفاس الاراجيل ، في حديث متقطع الاوصال ، تتخلله عناوين قصيرة واجابات مختصرة لا يفهمها من يحاول استراق السمع .
وفي احد الجلسات الاعتيادية تحمس اعوير لقراءة الجريدة اليومية بعد انقطاع طويل ، فشعر بالانفعال تجاه الاخبار والاحداث المحلية فشد على النفس وبدأ الحوار التالي :
اعوير : سمعت حكي رئيس الحكومة على التلفزيون ؟
اصوير : على راي المثل " يا بنرفع الاسعار يا بينزل الدينار "
اعوير : ما الحكومة عارفه انه الناس عالحديده ؟
اصوير : طبعا "اذا كان هذا يكيدك انا ازيدك "
اعوير : بس يا اخي هالرئيس من ما استلم وهو بيرطن بموضوع الاسعار ؟
اصوير (بعدما شد على نفس الارجيله وزفر بصوت مبحوح ) : ما هو يا صديقي "شيشة الثرثار يحتاج لها فحم كبار"....ناره يا شباب ... آخ يا خوي يا عوير " الكحة ولا كتمة الصدر" .
اعوير : هذا اللي كان عامل معارض للحكومات وبدو مصلحة الناس ؟
اصوير : " كنت بالقديم ماني راضي وجاني الجديد زود أمراضي " لكن " الدنيا زي النوريه ترقص لكل واحد شويه" ..تتذكر يا عوير لما كنت اقول لك " أرضي بقردك لا يجيك أقرد منه " او هيوه " ابو زنّه دخل الجنه " .
اعوير : بس الزلمه بيقول ان الدعم الحكومي سبب عجز والمديوينة تعدت الحدود والبنك الدولي ضاغط علينا .
اصوير : " الله يقطع الخل على الخردل على بياع المخلل " ما هو "الفقر كابس والرزق حابس " والحياه " كد وقهر وشيء يقسم الظهر".
اعوير : حيلك !حيلك ! "إذا غلي عليك الضأني ميل على الحمصاني" يا خوي حط حالك محل الزلمه .. ما " اللوح قال للمسمار فلقتني قال له لو حسيت بالضرب اللي على رأسي عذرتني"
اصوير : عذرتني ؟؟؟ طيب " افتكرك بايه يا بصلة وكل عضه فيك بدمعه " "جيتك تكون ليا عون طلعت عليا فرعون" ... خلاص يا ناس اتعبنا "كثر الشد بيرخي " و"اللي يسكت في اللي يضره الشيطان بيغرّه ".
اعوير :على سيرة الشد ، ملاحط انه ما فتحولنا سيرة شد الاحزمة ، أظن هاي المرة رح يصرفوا صخرة بوزن اثنين كيلو مع الكوبون وتعليمات شدها على البطن لتحمل الجوع ، على طريقة السلف الصالح .
اصوير : فعلا "اللي مالو مصيبه الحكومه مصيبته " لما قالوا حكومة شهرين قلنا "قرد يسليني ولا غزال يعنّيني " الله يسهل عليك يا اللي ببالي " اللي متحبش تشوف وشه يجي يوم وتتمنى تشوف قفاه" .
اعوير : هذا اللي كان نائب وبيحكي باسم وجع المواطن فكرناه راح يضبط الاسعار بس من اول يوم اجانا زي اللي طالع من فانوس ... بدي ارفع بدي ارفع بدي ارفع !
اصوير : "يا مرتجي السمنه من شحم النمله عمرك ما تلقي حتى قمله "
اعوير :يا عمي ليش كل ما تصير ازمه الحكومه بتتشاطر على المسكين الفقير والغني ولا عنده ولا عند باله .
اصوير : لانه "لما الغني شكته شوكه صارت البلد في دوكه ولما الفقير قرصه الثعبان قالوا بلا كثرة كلام " .
اعوير (وهو يقلب صفحات الاخبار المحلية) : لا حول ولا قوة إلا بالله ، المطالبه باطلاق سراح من ارتكبوا تجاوزات بالمسيرات .
اصوير : "شباب عشق التنبله ما عنده لا شغله ولا مشغله" يا عمي "أمسكوا غنمتكم تيسنا ما يجيها " لكن جيل هامل " الجدود ناموا والقرود قاموا ".
اعوير : بس شايفلك المعارضة شاده حيلها على مقاطعة الانتخابات .
اصوير : "لا الفارة طاهرة ولا دعاويها مستجابه".
اعوير : لكن كثير من الناس مصدقينهم ، وخصوصا لانه مقتنعين بانه الفساد ما صار عليه اشي .
اصوير : " اللي بيته من قزاز ما يغيرش هدومه في الصالون" " اعمى يقول لاعور صحيح العمى مر ؟ قال له نصف الجواب عندي"
اعوير : يعني المسؤولين ما كان عندهم فساد ؟
اصوير :شوف .." ثلاثة مسؤولين لا تأمنهم السكران والجيعان والعشقان" وبعض المسؤولين " تأمنه على دكان خيش ولا تأمنه على قرص عيش " وبعضهم تعلّم على "المال السايب اللي بيعلم السرقة " اما اللي قاهرني فساد " أبو صطيف و شرشر ..واحد بيغسل والثاني بينشر " .
اعوير : يعني الفساد اللي مسكتو الحكومه كافي ؟.
اصوير : الفساد اللي مسكوه "شيء بده شاهد وشيء شاهده منه فيه" بس الغلط انه " حسبنا حساب الثعبان ونسينا العقارب والفئران"
اعوير : طيب شو رايك بالتحالفات اللي قاعده تصير للمقاطعة ؟ .
اصوير : " أتلاقت المكنسة مع البلاعة وصاروا الاتنين جماعة " و"إذا تحالف القط والفار يا خراب الديار".
اعوير :يا رجل ماهمه مدعومين من الامريكيان .
اصوير : "أتدلعي يا عوجة في السنين السودة " هذول هيك " بكفك تسقيه وبايدك تلقم ثمُّه ويحط اصابعه في عينك ولا يستحي على دمه".
اعوير : بس مش كل اللي بيعارضو في الشارع هيك .
اصوير : لا يا حبيبي " الناس أجناس .. ناس فضه وناس نحاس ..وناس ذهب ماله قياس ..وناس لؤلؤ وألماز .. وناس أوناس ... وناس لأناس ولا أوناس ...وناس كوسواس خناس يسعون في الفتنه بين الناس ، ويستأهلوا الضرب عالراس بالمهراس.
اعوير : ما احنا طاير عقلنا من رفع الاسعار ليش ما نضغط على الحكومة بمقاطعة الانتخابات إذا رفعت الاسعار ؟
اصوير : خلينا صريحين هذي بلدنا وهذي حكوماتنا و "طول عمرك يا تينه في مقفاكي عود " اما عن رؤساءنا "فمن هالك لمالك لقباض الارواح " ما تغير علينا شي .
اعوير : بس الاخير خطير " بينادي الناس للصلاة وبروح لشغله ".
اصوير : الزمن بدو اللي "حبسوه في كيس مع ابليس طلع ابليس منه يستغيس " و "لو ما نعرف امه وابوه كنا قلنا العفاريت جابوه " .
اعوير :كل هالزعل من الحكومة وما بدك تقاطع وتنزل عالمظاهرات .
اصوير : قلنالك لا تخلط الامور الانتخابات حق والتعبيرعن الراي حق ثاني ، اذا طالبناهم بالتخلي عن الحق الثاني وما يعملوا مسيرات ما رح يقبلوا ، طب ليش انا اقبل اتخلي عن حقي بالانتخاب ؟
اعوير : اول مره بتجاوبني بوضوح ، يعني ما نشوّش على الحكومة ونشتم النظام ونرفع شعارات ماسخة ونقاطع .
اصوير : لا خيوه خلينا بحالنا " قمح ما هو قمحك لا تحضر كيله .. تغبر شاربك وتتعب في شيله"
اعوير : مش هذي سيارات الرئيس اللي مارقه يا اصوير .
اصوير : صحيح والله ،"رب صدفة خير من الف ليلة وليلة " ....لو ذكرنا مليارين دينار كان حلولنا المشكله ....