لما نصفي النية

جفرا نيوز - حمزة ابو نوار 

عذراً لأنني ساخلط الفصحى بالعامية، لأنه (لما نصفي النية)، بإذن الله رح ينزل المطر، ورح ترتوي الأرض، وتمتليء السدود. و(لما نصفي النية) رح يرزقنا ربنا بوزرا من نوع جديد؛ وزار (فوتيك) مش وزرا (كاجول)، وعلى طاري وزراءنا، ما بعرف ليش كل ما نجيب سيرتهم بتنط براسي أغنية (طل النشمي من الخندق، الأخضر واليابس أحرق). و(لما نصفي النية) ربنا رح يقصم ظهر الفساد، لأن (الحرامي) اللي كان يجلس في الصف الأمامي، لن يتعدى بعد اليوم محيطه؛ (احترامي للحرامي).

إنتَ (صفي نيتك)، واتركها على أبو خيمة زرقا (جل في علاه)، رح تزبط معك، دكانتك الصغيرة (اللي بلعتها المولات الكبيرة) رح ترجع تشتغل، وربنا رح يوسع رزقك. (صفي نيتك) وراح تلاقي العروس اللي بتحلم فيها، عروس أبوها رح يقلك إحنا بنشتري زلمة، مش إنه بنتي متقدمها (عشرة) ومـتأخرها (عشرة) زي بنات عمها، وحفلة الخطبة بالأوتيل، والعرس بالفندق، وتزبيطة أم كشة بصالون (كوول ليدي)؛ ويحضرني هنا جملة (انجلينا جولي) في فيلم (تورست) حين قالت للمثل (جوني ديب) الذي كان مضطراً أن يقوم بعمل عملية تجميل ليغير ملامح وجهه: يا (جوني)، دفعت عشرين مليون، وما اخترت غير هالوجه.

إنتَ (صفي نيتك)، وارميها على الله (زي ما حكى جبل في الهيبة)، ربنا رح يحميلك أولادك، وبتدبيره (عز وجل) رح يخفف عنك أقساط المدارس والجامعات، وعلى باب بيتك، وانت تغادره كل يوم سعياً للرزق قل يا (يا هم، إن لي رب كبير)، وأبداً لا تقل أبداً (يا رب إن همي كبير).

وإنتِ (صفي نيتك)، سيمكنك الله كإمرأة مناضلة، وسيأتيك التمكين (تمكين المرأة) من غائب علمه (عز وجل)، ولن يأتيك التمكين فقط من (سيداو)، ولا من قعقة المؤتمرات، والندوات، وورشات العمل الداعمة للمرأة. (صفي نيتك) رح تلاقي الوظيفة، والعريس، والجليس، والأنيس، ويمكن سفرة لباريس.

إنت أب، (صفي نيتك) ربنا رح ينجحلك أولادك. أنتِ أم (صفي نيتك) ربنا رح يحميهم، ويرزقهم، وينصفهم في هذه الدنيا. إنت مدير (صفي نيتك) وادعم موظفيك يأتوك بالتطور والنجاح. أنت شيخ (صفي نيتك) واتق الله فيما تقول وتفعل. أنت مسؤول (صفي نيتك: إذا بتقدر) رح يطول معك الكرسي، وحتى لو ما طول بتطلع بالسمعة الطيبة.

الأردني النشمي بيقول (الرك على النوايا)، وصفاء النوايا، مطر وخضرة شجر، في ومي، ورزق وسيع، ووزير شاطر، ومسؤول منيح، وشيخ أصلي مش شيخ صيني. ولك الله يا وطني، ولك صفاء نوايا الأردنيون المخلصون الشرفاء.