محمد سامي لعمرو سعد: "أنت مش رقم واحد"

أشعل المخرج محمد سامي، مواقع التواصل الاجتماعي بمقطعي فيديو، رد خلالهما على تصريحات الفنان عمرو سعد، بأن مسلسله "إفراج" الذي يعرض حاليا بالموسم الرمضاني، هو الأعلى مشاهدة في العشر سنوات الأخيرة، حيث أوضح أن الأعلى مشاهدة هو مسلسله جعفر العمدة بطولة الفنان محمد رمضان، مستنكرًا تصريحات عمرو سعد.

وقال محمد سامي، في الفيديو الأول: "فكرة رقم واحد لفتت نظري لزميل غالي عندي نجم، عامل فيديو ماسك فيه بعض المستندات وبيقول أنا المسلسل رقم واحد، طيب المسلسل رقم واحد محتاج بذل مجهود علشان الواحد يفهم إن ده رقم واحد أو اتنين أو ألف، رقم واحد ده محتوى بيلقى استحسان الجمهور وبيحصل تداول في الشارع، وتفتح الإنترنت تلاقيه وتقعد على قهوة تلاقي الناس بتتكلم عليه، إنه مسلسل بيعمل حالة رواج ويبقى رقم واحد أو من الأرقام الأولى، وفيه حاجة اسمها توثيق زي المنصات موجودة في البيوت الناس مشتركة فيها، بتلاقي فيها أفضل عشرة مسلسلات لأن الناس بتتفرج عليها طبقًا لحسابات الكمبيوتر، ولكن فكرة صعبة جدًا إنك تقدر تقول مين اتفرج على إيه على التلفزيون، هتقدر تعرف منين الساعة 9 إن حد قاعد بيتفرج على إيه؟ بيحصل اجتهادات من شركات محترمة بتحاول توصل لحاجات، ولكن الدرجة بتاعة إن ده يكون مظبوط مئة بالمئة بالمنطق كل واحد يقدر يفكر فيها".

وتابع محمد سامي: "أنا النهاردة كنجم لما آجي أسيب المنصة اللي أنا رقم 7 فيها وأقول أنا رقم واحد في التلفزيون اللي مقدرش أثبته يبقى ده غلط، لأن لما كان جعفر العمدة رقم واحد على التلفزيون وفي الشارع كان رقم واحد على المنصات، لما أي مسلسل لزملائي اللي هما أحسن مني كمان يكون رقم واحد يبقى رقم واحد في كل حتة، فمينفعش أحاول أثبت للجمهور فكرة إن أنا مسلسلي رقم واحد في الشيء اللي مش باين بورقتين في إيدي، الناس كلها عندها ريموت تقدر تفتح المنصات وتشوف مين رقم واحد، فواضح للجمهور إن مينفعش مسلسل رقم 7 أو 10 على منصة يبقى رقم واحد في التلفزيون".

وأضاف محمد سامي: "لما أقول مسلسلي أعلى تقييم في آخر عشر سنين، الجمهور يضحك عليك على طول، زي ما نزل الزميل العزيز، عمرك ما كنت أعلى من مسلسل جعفر العمدة والأسطورة والبرنس، أنا مش بضلل الجمهور، في 100 ألف طائفة بيتفرجوا على التلفزيون مينفعش إني أغفلهم وأقول إن المسلسل أعلى تقييم في آخر عشر سنين، لو أنت نزلت سؤال دلوقتي إيه أكتر مسلسل عمل رواج في آخر عشر سنين هتلاقي مسلسل جعفر العمدة هو ظاهرة، مفيش مسلسل تاني وصل لحالة الرواج دي وده بشهادة زملائنا، زي ما بنقول إن برنامج رامز جلال ظاهرة ومفيش بيت مصري مش فاتحه.

واستكمل: "مفيش حاجة اسمها مسلسلي الأعلى في آخر عشر سنين، الجمهور يعلم جيدًا ومش محتاج حد يقوله، إحنا لما بنقول للجمهور بنقول ده للتوثيق لأن بقى بسهولة أي حد نجح أو منجحش يقول أنا رقم واحد، تريند بـ 75 جنيه ويقول أنا رقم واحد، رقم واحد ليها دلالات مع الجمهور، كلمة رقم واحد دي بقت تعصب".

محمد سامي لعمرو سعد: لو أردت ان تقول أنك الأعلى أجراً فلتعلنه

ونشر محمد سامي، مقطع فيديو آخر رد فيه على تصريحات عمرو سعد، قائلاً: "هل أنت أعلى قيمة تسويقية من كريم عبد العزيز ومحمد رمضان وأحمد عز؟، الكلام ده مش حقيقي وعلى مسؤوليتي الشخصية".

وأضاف أن هناك تحاملًا من قبل الجمهور على الأعمال الفنية بسبب الأرقام المنتشرة حول أجور الفنانين بالأعمال، قائلًا: "مينفعش أطلع أقول أنا الأعلى أجر، في هوليوود معروف أجور الفنانين وبيتم الإعلان عنها لأنهم بيدفعوا ضرائب، وهنا كمان مش هيهربوا من الضرائب وكله بيسدد وبالتالي بدل ما كل حد يقول أنا الأعلى لما يمضي ينزل صورة أجره طالما عايزين نتباهى بالأجور، ينزلها على السوشيال ميديا بدل ما واحد يكون واخد جنيه يقول إنه واخد 50 ونقعد نزود الأرقام".

وتابع: "الجمهور بيحس إننا بناخد أرقام غريبة جدًا، وبيحصل تحامل على الأعمال لأن الجمهور بيحس أن ده كتير جدًا على اللي بتقدمه وده صحيح ومحدش بياخد بالأرقام دي".