جفرا نيوز -
كشفت الفنانة منى زكي تفاصيل تحضيراتها لتجسيد شخصية "كوكب الشرق" أم كلثوم، كما ردّت على الجدل الذي أُثير خلال الفترة الماضية بعد طرح برومو فيلم "الست"، موضحةً أن العمل كشف عن الجوانب الخفية في شخصية "كوكب الشرق" ولم يركّز على الشكل الخارجي.
وقالت منى زكي في تصريحات لمنصة SNRTnews، على هامش حضورها عرض الفيلم في "مهرجان مراكش السينمائي الدولي" بالمغرب: "فيلم "الست" أصعب عمل في مشواري الفني لأننا بنتكلم على سيدة عظيمة نفسنا ندّيها حقها وأكتر لأنها تستاهل، فكان صعب بداية من الاسم للشخصية اللي أنا بقدّمها وتحضيراتها لأني بقدّم شخصية من نشأتها لغاية ما بتكبر في عقود، السيدة أم كلثوم مرت على 3 أو 4 عقود مختلفة وهي نجمة كبيرة، فكان صعب أوي المشاعر المختلفة لكل مرحلة والأداء والصوت وطريقة الكلام، كل حاجة كان فيها تحدي صعب جداً".
وتابعت: "كنا قلقانين من رد الفعل ولكن الحقيقي أكتر إن البني آدم مش تمثال وعنده مشاعر ونقط ضعف وأوقات بيبقى غضبان وبيعمل قرارات مش صح، آه كنا خايفين ولكن كنا مؤمنين أن الحاجة الحقيقية مش بتسيء، مظبوط إننا نحطها علشان نعمل أقرب ما يكون من وجهة نظرنا داخل السيدة أم كلثوم مش الظاهر من برا للناس".
وعن الجدل المُثار حول الفيلم، قالت منى زكي: "طبيعي لمكانة السيدة أم كلثوم، أعتقد ده طبيعي وكان بيحصل جدل بالشكل ده كل ما يتعمل سيرة ذاتية لفنان، والجدل ده أنا بحترمه جداً وبسمع لكل حاجة فيه".
وعلّقت منى زكي على مقارنتها بالفنانة صابرين، والتي سبق وقدّمت شخصية "كوكب الشرق" في عمل درامي عام 1999، وكان من أنجح أعمال السير الذاتية.
وقالت منى: "الأكيد أن الفيلم بيقدّم رؤية مختلفة عن مسلسل "أم كلثوم"، ولكن أنا خفت لأن أستاذة صابرين عملت حاجة التاريخ بيذكرها لغاية دلوقتي وأنا أقل من إني أقول رأيي، بس أنا كنت من متابعي المسلسل وحبيته جداً، وطبعاً لو اتقارنت بصابرين هكون أنا اللي بتظلم، وأتمنى محدّش يقارنّي، لأنها أستاذة كبيرة وموهبة كبيرة أوي هتحط أكيد في موقف مش حلو ليا لما أتقارن بحد في عظمة صابرين".
النسخة الكاملة
