جفرا نيوز -
جفرا نيوز- بقلم: د. محمد ابوعمارة
-دكتور، هنالك مشكلة كبيرة بباص رقم (22)
-خير! شو في؟!
-دكتور، المرافقة اللي كانت مع الباص طلعت حامل
-طيب الحمد لله مبارك
-ما هي إلها ثمن سنوات متزوجة وما خلفت، وما خلت دكتور إلا وراحتله وبالآخر لو تعرف مين اللي أعطاها النصحية اللي خلتها تحمل؟!
-مين؟!
-لأ إحزر!!
-سوزان بلا هبل!! شو إحزر!! مين بحكيلك!!
-خلص خلص، يا بيي شو عصبي (أم جميل) هي اللي دلتها على الطريقة...
-والله ما إنت قليلة يا إم جميل، طيب وين المشكلة!!
-المشكلة إنها أخذت إجازة مشان ترتاح حتى تثبت الجنين!!
-طيب لهون وين المشكلة!!
-المشكلة إنه خلينا وحدة من المعلمات تقوم بركوب الباص بدل المرافقة مؤقتا لحين ما ترجع للدوام..
-ممتاز، حل ناجع!!
-وطلعت المس (جوليا) مع الباص
-جوليا!! ما لقيتوا غير مس جوليا!! يعني ما بلبقلها تطلع مرافقة، المس ناعمة كتير!
-ما في حد ساكن بالمنطقة غيرها!!
-طيب بارك الله فيها، وشو صار؟!
-والله يا دكتور إجت من الجولة منهارة وبدها تقابلك هي والمديرة لأنه عندها كتير ملاحظات!!
-طيب ما في مشكلة خليهم ييجوا بعد ساعة واستدعي كمان مدير الحركة وسائق الباص
-تمام دكتور!!
وبعد الساعة رن هاتف المكتب...
-دكتور المديرة والمعلمة جوليا وأبو قصي مدير الحركة والسائق توفيق موجودين!!
-دخليهم كلهم ما عدا السائق توفيق ، خليه عندك!!
-حاضر دكتور...
ودخل المكتب عندي المديرة والمعلمة ومدير الحركة...
-أهلاً مس، كيفك بداية بشكرك على موقفك النبيل بأنك ساعدت زميلك وحليتيلنا مشكلة بالجولات.
-أهلاً دكتور بس المشكلة إنه في كثير (mis-understanding) لكتير ناس بمفهوم وظيفة (Bus Escort)...
وأثناء حديث المعلمة كان العرق يتصبب من رأس أبوقصي مدير الحركة لشعوره بأن هناك مشكلة كبيرة..
-متل شو؟!
-يعني الـ(Parents) بحسبوك إنك (House Maid) بدهم ياك تحمل الشنطة وتنظف الباص والشارع في عندهم (Misunderstanding) كبير كتير!!!
وأثناء ذلك يقترب مني أبو قصي ويهمس بأذني...
-والله يا دكتور الأسبوع الماضي دافع على الباص (سبعمية دينار) ونفظتوا من الباص للمحراب وغيرت كل اللي حكت عنهم هذول!!
-ايش اللي حكت عنهم هذول اللي إنت غيرتهم!!
-هذول (الإسكوت والبييبرت) وكل إشي!!
-ما شاء الله عنك غيرتهم كلهم!!
-آه والله ومعي فواتير!!
-ممتاز.. طيب كملي يا مس، تفضلي!!
-بس موه اي هي الـ(Problem)، الـ(Problem) الكبيرة هي في الـ(behavior) للـ(driver) وللـ(students).
-شو مشكلة الـ(driver) بالـ(behavior)!!
ويقترب أبو قصي مرة أخرى...
-أقسم بالله يا دكتور إني غيرت (الدراي شفت) اللي حكت عنه..
-هي حكت دراي شفت يا أبو قصي!!
-آه حكت!!
-لأ حكت driver مش دراي شفت!!
-مش هو نفسه!!
-لا مش نفسه يا أبوقصي!!
-طيب..
-كملي يا مس جوليا شو صاير معك بالباص!!
-بصراحة عمو الـ(driver) كتير بيزمر بس توصل على باب الـ(student)
-طيب ما هي هاي الطريقة التي بنستخدمها إنه بيوصل الباص لباب بيت الطالب (وبيزمرله) لحتى ينزل بعد ما نكون رنينا على التلفون قبل ما نوصل بشوي لحتى يجهز الطالب !!
-لأ دكتور أنا رنيت والطالب كان جاهز ومامتو حكت إنه ready ولما وصلنا الـ(driver) زمر زامور طويييل وأزعج كل الجيران وما راعى نفسياتهم!!
-آه، أوك المشكلة بنفسيات الجيران، معك حق!!
-ابوقصي: دكتور، الزامور محروق، شوماله! سامعكم بتحكوا عن الزامور!
-لا يا أبو قصي مش محروق، شوي وبشرحلك!! وشو كمان يا مس جوليا؟!
-كمان طريقة السواقة يعني بيضل الـ(driver) يعمل (between) والـ(fast) اللي بسوق فيها (is more than allowed)
-ايون!! وشو كمان
-وكمان (some of word) اللي بيستخدمها مع (other driver) يعني (like) حل عني... ما.... إبعد يا..... (really) أنا ما فهمت (what’s the meaning of this words) بس حسيت أنها مو منيحة !!
-لأ، ما تظلميه لتوفيق ونظرت نحو ابو قصي توفيق لسانه ناعم وما بتطلع منه العيبه ومش بالزبط، يعني هي عبارات بتستخدم بتشبه لغة خاصة بيهم!!
-آه،(drivers language)
-ايون بالزبط!!
وهنا يأتي أبو قصي مرة أخرى...
-يا دكتور قبلي صار بركبي مالها المس مريضة؟! حد مدايقها!! خير طمني؟!توفيق عامل إشي ؟ صارحني!
-موضوعك مهم للغاية مس، إحنا فعلاً بحاجة لتغيير كتيرمن المفاهيم منها حق الآخر ووجباتنا قبل حقوقنا،
-بصراحة دكتور المشكلة بالـ(attitude) للـ(driver)..
وهنا نظرت نحو أبو قصي وقلت...
-إنت فاهم شو يعني attitude))
-بصراحة مش كتير هو هاظ انجليزي ولا اسم ماكنة؟!!
-لا انجليزي
-طيب دكتور انا بيني وبينك سمعت كلامها كله وعملت حالي فاهم بس اقسم بالله مش فاهم احكيلي شو قصدها المس؟!
-قصدها إنه الشفير اللي عندك بدة فرط وجمع من جديد لأنه كل البيل اللي عنده بدهم تزييت وماتور مخه بده أفرهول والبككس تبع وجهه بده تغيير ملامح وبطارية الصبر اللي عنده بدها شحن والكهربا اللي بلسانه بدها فصل لأنها بتشلف... ولازم يعمل ميزان ستيرنج ويمشي مزبوط هون!!
-جوليا: دكتور، شو حكيت لعمو أبوقصي ؟
-لأ بس فهمته كيف يغير الـ attitude)) تبعت الـ(driver) لأنه الـ(language) زي ما حكيتلك بتختلف من بيئة لبيئة ونظرت نحو أبو قصي وقلت...
-فهمت يا معلم!!
-ولا يهمك معلم هسه عَالحارق بفك بواجيه للشفير وبعمله أفرهول وبرجعلك ياه بحال الوكالة!!يظوي ظوي
-جوليا: أبو قصي (Many thanks) و (Many thanks) دكتور!!
-لا ولا يهمك، جاهزين إحنا جاهزين لأي ملاحظة.
وذهبت لأرى السائق توفيق الذي كان ينتظر عند السكرتيرة وأنا أدرك تماماً أن الفضول يعتريه ليعرف الذي دار بيننا وغمزت لأبو قصي وقلت
-هيو قدامك ... فرمته....
*مدير عام مدارس الراي
النسخة الكاملة
