جفرا نيوز - بقلم - الدكتور محمد ابوعمارة
في يوم مدرسي خال من الطلبة بسبب جائحة الكورونا
-دكتور إلحق...
-خير شو في!!!
-تفضل هي علامات الصف التاسع في الرياضيات الإمتحان الثاني
-أشوف!! ما شاء الله مستواهم متحسن كتير صايرين ممتازين جداً.
ما شاء الله والله جهد الاستاذ يوسف واضح، تبارك الله معظم طلبته علامات كاملة لازم نكرمه للأستاذ والله إنه ببيض الوجه...
-دكتور... (ويهمس الاستاذ في داخله : شكله الدكتور ولاحبه) !
يا رجل انت مقتنع إنه كل الطلاب تحسنوا يعني!!
-وما المانع؟! إذا كان الأستاذ مبدع!!
-استاذ يوسف مبدع!! واعجبي!!
-لأ، أنا ما بسمحلك تسيء لزميلك!!
-لا والله يا دكتور ماقصدت اشي لانه الاستاذ يوسف صديقي وما بكنله إلا كل احترام!! بس يا دكتور!!
-خلص، مش حابب اسمع منك
-دكتورنا الحبيب آسف إذا أزعجتك بس يا دكتور في مشكلة كبيرة!!!
-لوسمحت!! مقابلتك انتهت..لو إنك معلم مبدع لكان حليت مشاكلك قبل ما تيجي عندي مش جاي مشان تسيء لزميلك الفاضل
فعلا إني حزين!
-طب يا دكتور لو سمحت
-لأ ما بدي أسمح !
ويغادر الاستاذ مكتب مدير المدرسة وسط صدمه وذهول!! وهو يتمتم :طيب المدير ليش حزين !
وبعد قليل تدخل معلمة اللغة الانجليزية لمكتب المدير...
-مرحبا دكتور...
-اهلاً مس زين
-دكتور لاحظت شيء غريب جداً بعلامات الطلبة!!
-جد؟! ما الذي لاحظته!!
-ارتفاع غير مسبوق، الجميع تنحصر علاماته في فئة الممتاز!!
-ما شاء الله والله يا مس زين هذا إنجاز غير مسبوق ويسجل لك ولقسمك
-دكتور!! أي إنجاز
-العلامات المرتفعة!!
-لا دكتور شكلك فاهم غلط!! هاي العلامات مش حقيقية هاي علامات لا تمثل الواقع الفعلي للطلبة.
-ليش انتوا ما عندكم ثقة بطلبتنا وطلبة مدرستنا!! هاي المدرسة يا زين خرجت أطباء ومهندسين، هاي المدرسة خرجت محامين ومعلمين!! هاي المدرسة إلها فضل عليك وعلى مئات العائلات!!
-دكتور، مافي حد بنكر هاد الحكي بس يا دكتور علامات الطلبة غير واقعية يا دكتور بتعرف جلال!!
-آه جلال اللي
-آه اللي
-اللي اللي ولا اللي اللي
-ايوا هو اللي اللي مش اللي اللي
-ماله
-جايب علامة كاملة في جميع المواد
-استحلفك بالله!
-والله العظيم يا دكتور
-له يا شيخة
-شايف شايف يا دكتور!!
-إيه... والله واتغيرت يا جلال علامات كاملة مره وحدة طب انجح بالأول!!
-طيب وابتتذكر زكية
-آه زكية اللي أهلها ما بدفعوا أقساط
-لا زكية اللي في الصف التاسع
-لأ مش متزكرها!!
-يا دكتور زكية اللي انت كل ما تشوفها بتحكي كل إنسان إله نصيب من إسمه إلا هاي البنت
-ههههه تذكرتها مسكينه مالها
-نفس الموضوع كل علاماتها كاملة !!
-لا مستحيل!!
-والله
-ولا ممكن أصدق
-يعني انا بدي أكذب عليك !
-ما بعرف شو دوافعك خالتي فتحيه بتحكي اللي بمشي على رجليه لا تحلف عليه !
-لا يا سيدي صدق وهي كشف علاماتها!!
وتخرج المعلمة زين ورقة وتضعها أمام مدير المدرسة ،،،،
-بس يا مس ليش انتوا بتحاربوا النجاح! وشو المشكلة إذا في طالب تطور مستواه !ما الذي يمنع!
-دكتور الذي يمنع إنه هدول الطلاب ما ارتفعت علاماتهم إلا بعد ما صار التعليم عن بُعد!!
-آه يعني التعليم عن بُعد لائمهم أكثر وناسب السيكولوجية التعليميه إلهم
-لأ يا سيدي أكيد مالائمهم ولا بطيخ !
لأنهم أصلاً ما بحضروا
-ولا!!
-أكيد في حد حلّ عنهم الإمتحانات!!
-لا مستحيل، ما أتوقع في حد بيعمل هيك!! أنا متفاجئ منك ليش صاير ظنك سيء بالناس والطلاب؟! ياااه شو غيرتك الأيام يا زين وين زين الطيبة البريئة للأسف تغيرت كتير كتير!! أنا حزين
-دكتور أنت فهمتني غلط
-لأ، أنا
-يا دكتور
-خلص مس زين لو سمحت أنا حزين...
وغادرت المعلمة زين مكتب المدير وهي تردد أنا حزينة، أنا تغيرت، أنا مش أنا ولا انت إنت ... أنا مش أنا...
وبعد قليل حضر أحد أولياء الأمور وطلب مقابلة مدير المدرسة...
-دكتور
-أهلا وسهلا
-دكتور بتعرفني
-أنت ولي أمر عنا في المدرسة
-طبعاً يا دكتور ولي أمر عندك يعني عفواً هاد مش ذكاء! بس أنا ولي أمر أي طالب؟!
-أحد أولياء الأمور في مدرستنا!!
-ما شاء الله عندك شو نبيه، قصدي أنا أبو مين!
-والله اعذرني أنا مش متذكر مين بالزبط!!
-وفرحان على حالك مش عارف طلبتك يا رجل والله ما أنا عارف كيف أنت مدير!
-لا حول ولا قوة إلا بالله، تفضل حضرتك شو المطلوب مني!!
-ول هاد انت ما بتتحمل لا حكي ولا مزح
-بالعكس، تفضل حضرتك طالب المدير بخصوص !!
-يعني بدك تحلقلي بسرعة!! طيب حاضر يا حضرة الدكتور أولاً أنا إلي بنت عندكم اسمها (زكية)
- ويتمتم المدير في نفسه (يا ترى أي زكية اللي ما بتدفع ولا إللي مش زكية؟!)
- وبنتي من يوم ما صار التعليم عن بُعد ما بتفهم ولا حرف عليكم أصلاً ولما كان التعليم عن قرب ما كانت بردوا تفهم عليكم ههههه.
-طيب عرفت بنتك كويس
-الحمد لله أزغرت أرقص أشد شعري شو أعمل مشان أعبرلك عن فرحي!!
-راجع المحاسبة وسكر الأقساط
-ما هو هون مربط الجمل
-أيون
-قسم المحاسبة بيتصل في بده أقساط وأنا جبت لبنتي (4) معلمات يدرسوها بالبيت ودفعتلهم ومن وين أدفع الكم ؟! هو انت شايفني قاعد على بنك !
-استاذي الفاضل، ليش جبت لزكية (4) معلمات طب ما إحنا في عندنا تطبيق مميز والتعليم مميز عن بُعد وكل صاحباتها مستفيدين والحمد لله.
-بس يا دكتور بنتي ما تحسن مستواها ولا ارتفعت علاماتها إلا لما جبتلها معلمات على البيت.
-طيب سؤال!!
-تفضل
-من اللي حلّ امتحانات زكية.؟
-لأ لحد هون وبس انا ما بسمحلك تشكك بنزاهة (زكية) عيب عليك يا دكتور يطلع منك هاد الحكي !
-والله أنا كمان حكيت نفس الشي امس زين !
-طيب ما جاوبتني أنا شو أعمل؟!
-أدفع للمدرسة..
-طيب وكمان إشي؟
-تفضل!
-ليش المعلمات بضلوا يحكوا لبنتي علاماتك مش مزبوطة؟؟
-صدقني إنهم غيرانين منها لزكية !!جمال وكمال وزكاء !
-أنا بردوا حكيت هيك جمال وزكاء ما شاء الله طيب يا دكتور كمان سؤال!!
-لا خلص
-شو اللي خلص
-مابدي أسمع السؤال ولا بدي أجاوب عليه بتقدر تروح عند مساعد المدير الاستاذ بشار
-ليش يا دكتور
-لأني حزين
-أنت حزين
-آه والله حزين
-ليش!!
-حزين عليك وعلى الجيل اللي مش فاهم شوبده وضايع بدون هوية ولا هدف ولاطموح ولا مستقبل ولاثقة فقدنا الثقة بحالنا وعم بنزرع عدم الثقة بولادنا!! بنغششهم وبنحكي ما تغشوا!! بنسرق قدامهم وبنطلب منهم يكونوا أمناء!!! بنكذب وبنطلب منهم يكونوا صادقين!! ما بنلتزم بالصلاة ولا بالصيام وبدنا ياهم يصلوا جماعة بالمسجد!! بنقل أدبنا على الناس وبدنا ياهم يكونوا مؤدبين
يا رجل والله إني حزين...
حزين...
النسخة الكاملة
