جفرا نيوز/ بقلم: الدكتور محمد أبوعمارة 

-ألو ... دكتور محمد، كيفك يا رجل والله زمان عنك وعن شوفتك

- أهلاً .. أهلا عطوفتك

دكتور ما بدي أطول عليك بدي ابعتلك إبن أختي وبدي ياك تدبره عندك بالمدرسة

-أبشر ولا يهمك هو بأي صف ؟

وأعتبره منحة كمان ولا يهمك عطوفتك.

-لا شو منحة ما منحة هو بده يشتغل مش يدرس خلص دراسة من زمان، والشب مرتب ورح يعجبك كتير.

-طيب شو دارس؟

-والله ما أنا عارف، بس شو رأيك أبعتلك إياه وتقابله وما بدك وصاة

-أبشر عطوفتك خليه يمر وإن شاء الله ما بقصر معه

-يعني اعتبره وعد

-وعد شو؟!

-انه خلص اشتغل وبراتب منيح!

-خلينا نشوف ما إنت عارف مهنة التعليم صعبة، بس ما تقلق أنا ما راح أقصر إن شاء الله

-حبيبي دكتور سلام..

يا الله أين سأعيّن هذا الشخص ونحن الآن قاربنا على إنهاء الفصل الدراسي الأول.. ويرن الهاتف مرة أخرى..

-ألو دكتور محمد كيفك!

-اهلاً اهلاً... 

-زمان عنك والله

-ربي يكرمك

-كيف حالك

-دكتور ما بدي أغلبك وهاي أول مره بدي أطلب منك اشي

-تفضلي ، أؤمري

-دكتور تذكر إنه هاي أول مرة بطلب منك إشي، في بنت خالتي دارسه عربي وشفت إنكم طالبين معلمة عربي وهاي البنت خرافية مبدعة وحلوة كتير ومش حلوة وبس فانتة فيا دكتور لا تكسفني

-شو ! إحنا طالبين معلمة عربي، خليني اتأكد من المديرة وإذا فيه شاغر ولا يهمك أكيد ما راح اقصر..خاصة إنها حلوة كتير 

-طيب أخليها تمرلك اليوم..

-اه كتير كويس..وإذا ممكن هسه أو إحنا بنروحلها إذا حلوة كتير كتير هههه

-باي

-باي

شو هاليوم اللي بلش بالواسطات... وذهبت لأبدأ جولتي الصباحية على الصفوف.. وبعد أقل من ساعة عدت لمكتبي لأجد شخصاً ضخماً موجود عند السكرتيره... سلّمت عليه وصافحته فشد على يدي لدرجة أن عظامي تكسرت وغضاريف أصابعي قد قفزت للخارج.. دخلت المكتب وأنا أشعر بألم شديد،وبعدها دخلت خلفي سوزان مسرعة وقالت: دكتور في شب بده يقابلك من طرف عطوفته ..

-آه حكى معي قبل شوي خليه يدخل..

-ويدخل ذلك المارد الكبير، شب طوله أكثر من مترين ضخم الجثة وعريض المنكبين ،عد جد عريض المنكبين وهو نفس الشب اللي كسر اصابعي وخربطلي الغضاريف!

-تفضل 

-اهلاً دكتور أنا سامح خالي بكون عطوفته...

-أهلا يا سامح، كيفو خالك

-حمدلله وحكالي آجي أستلم الشغل بس بالأول لازم نتفق على الراتب يعني انت عارف...شب ومصاريف وأكل بدها مبلغ 

-استنى شوي أي شغل؟

-مش عارف، بس كأنه حكالي اختار أستاذ أو مدير مدرسة وانا متحير!!

-شو أنت أول اشي شو دارس حبيبي

-معلم صف

-عفوًا 

-شو دارس

-حكيتلك معلم صف، 

-لا بتمزح 

-ليش بمزح والله معلم صف

-طيب كيف يعني لما قبلوك بالتخصص ما شافوك؟!

-ليش خير شو مالي، ناقصني أيد ولا رجل 

-انت إنت مش ناقصك اشي انت عند زيادة إيدين ورجلين وشوية أعضاء أخرى.

-يعني رح استلم الشغل ولا احكي لخالي!

-يا حبيبي، ما تزعل مني، انت ما شاء الله رجل قوي البنية والشكيمه وشكلك عنيف وضخم، تخيل ادخلك تدرس طلبة صف أول أو روضة؟!

-طيب شو المشكله؟

-المشكلة إنك رح ترعبهم يا حبيبي، هدول أطفال بدهم نعومه وليونه بالتعامل، بدهم أيدي رقيقة، أم تحتضنهم مش أيدي تعصرهم، الله يسامح اللي خلاك تحتار هيك تخصص لإنه ظلمك، أنت كل التخصصات الأخرى تليق بك الا هذا التخصص ظلم إلك وللأطفال.

-يعني شو أحكي لخالي

-احكي لخالك يشغلك بـ(GYM) مش بمدرسه يا حبيبي روح الله  يسهل طريقك، ويغادرني ذلك المعلم الضخم مكتبي، لتركض سوزان .. 

-دكتور في بنت بره بتحكي إنه إلها موعد معك

-خليها تتفضل، وتدخل فتاة انيقة رشيقة مهفهفه المكتب  وأنا أقول في نفسي أيوا هيك إحنا ما عنا وسط يا أما وحش يا إما حورية!

-تفضلي يا هلا يا هلا

-"موحبا دكتوو"

-عفواً 

-"موحبا دكتوو"

-اهلين 

-انا من "طوف" (...) اللي حكت معك عشاني مشان وظيفة معلمة اللغة "العوبية"

-"العوبية"، ما شاء الله انت عندك "خبوه"

-ايش قصدك ليش بتحكي "خبوه" مش "خبوه"

-لا مش قصدي اشي والله بس كأنه عندك مشكله بحرف الراء ؟

-"حوف الواء" لا أبداً ما في أي مشكله ليش إنت "حاثث " انه في مشكله؟!

-وكمان كأنه في مشكله بحرف (السين)؟

-"الثين " لا "ثو" ماله "الثين"

-"الثين" مفروض حرف الثاء والسين حرف آخر

-طبعاً "بعوف" إنه "الثين" عير "الثاء" ، شو شايفني انا مش متعلمه أنا "داوثه عوبي عوبي" ومن الأوائل على الدفعة كمان.

-لا حول ولا قوه إلا بالله طيب انت ليش زعلتي 

-لانك يا "دكتوو بتثتخف" بكلامي.

-"بالعكث " أنا والله ما "بثتخف" بكلامك أنا "بحتومك وبقدوك كتيو كتيو كتيو"

-شايف إنك بتتخوث علي

-ليش

-لأنك بتحكي "بطويقة" مش صحيحة

-يعني بقلدك

-صح

-يعني إنت عنك مشكله بحرف (الراء) و(السين).

-لأ ما في عندي أي مشكله المشكله عندكم انتم ياللي ما "بتعوفوا غيو التنمو" على "الناث" و "حوام" عليكم والله "حوام"، "حثبي" الله ونعم الوكيل يا "دكتوو"

-يا بنتي يا غالية والله مش قصدي ابداً  إني ازعلك أو أدايقك، بس إنت والله اخترت اختيار خاطئ، يعني أولا : كان بإمكانك معالجة المشكلة باللغة من خلال زيارة مختص، والتخلص نهائياً من مشكلة اللفظ، ولو ما بدك تحسني اللفظ الخطأ ،الخطأ الأكبر إنك تختاري مهنه التدريس وخاصة تدريس اللغة العربية لأنه أحد أهم شروطها سلامة مخارج الحروف والنطق السليم.

-يعني يا "دكتوو" ما في وظيفة!

-لا يا عزيزتي للأسف بس أنا ممكن أساعدك بإرشادك لمركز تصحيح للنطق.

-حسبي الله فيك يا "دكتوو".

وتغادر المكتب وأنا أمعن التفكير في هذه الصبيه وذلك الشاب، لا أدري من الذي أشار عليهم بتضييع مستقبلهم بإختيار تخصصات لا تتناسب مع امكانياتهم ولا شخصياتهم، ألا يوجد قسم ارشاد مهني  فعال يساعد الطالب على اختيار التخصص المستقبلي ومن إمكانياته، وأقسام اللغات ألا تجري مقابلات شخصية للتأكد من سلامة النطق قبل قبول الطالب، وكليات التربية لماذا  لا تكون المقابلة الشخصية إحدى شروط القبول الموحد!

أسئلة كثيرة برسم الإجابه عصفت في ذهني وشعور بالذنب يأسرني!!

من عدم مساعدة مفتول العضلات والحسناء التي قلبت موازين اللغة العربية!