جفرا نيوز/ بقلم: بقلم الدكتور محمد أبو عمارة

تسألني جوليا، بابا ليش انت بتحب البحر؟؟!

-أسباب كثيرة يا بابا بس أهمها إنه البحر عالم كبير وغامض ومليان أسرار!

-كيف يعني عالم، أنا شايفه إنه عبارة عن بركة كبيرة وبس!

-صحيح يا بابا، بس الموضوع إله أبعاد مادية ومعنوية ونفسيه، 

-مش فاهمة عليك بابا

-يعني يا بابا البحر عالم فيه اسماك ونباتات وحياة كاملة

-يعني في ناس عايشين جوا البحر؟

-لا مش ناس، كائنات بحرية أسماك وحيوانات أخرى 

-طيب

-وهاي الأسماك عايشة فيها الأسماك الكبيرة والأسماك الصغيرة والمفترسة والطيبة والهادية والمشاغبة 

-طيب بابا السمك إله بيوت بيعيش فيها 

-آه بابا وكمان عائلات وقرايب وبزوروا بعض وإلهم أصدقاء وصديقات وحياة كاملة

-جد مو متخيله أنا

-لا بابا تخيلي حياة كاملة بكل تفاصيلها بيتجوزوا وبيخلفوا وبيتخانقوا 

- بيعملوا عرس بابا ، زينا ؟

- طبعًا وبيرقصوا وبيغنوا 

-عندهم دكاكين وأشياء زاكية

-مش بالزبط بس في اشياء زاكية خاصة بالأسماك 

-ممم ، طيب شو كمان

-في بابا سمك كبير شرير بيعتدي على السمك الصغير وبياكله

-يا حرام  ليش يا بابا

-هاي سنة الحياة  يا بابا دائمًا في خير وشر وفي أخذ وفي عطاء يعني هيك الحياة

-طيب يا بابا، بصراحة أنا مو فاهمة ليش مية البحر هي وبالبحر لونها أزرق بس لما ناخذها ونحطها بعلبة بصير لونها نفس  لون المي !!

-آه بابا، السبب هو انعكاس لون السماء على سطح البحر

-ممم يعني مش كتير فهمت بس خلص أنا سألتك كتير، طيب بابا بس كمان سؤال :صحيح  انه سمك القرش بياكل كل الكائنات الأخرى 

-نعم هو سمك مفترس وبيشم رائحة الدم عن بعد وبيعتدي على الاسماك الاضعف منه.

-يعني أخلاقه مش كويسة

-اخلاقه يمكن!! بس هو كائن مفترس

-يا حرام هالسمك الصغير الكل بياكله .

من جهه الحيتان بتبلع السمك الصغير والقرش بتاكل السمك الصغير وكل الكائنات البحرية بتاكل هالسمك الصغير يا حرام يا بابا فعلاً هالسمك مظلوم!

-آه يا بابا، شو بيشبهنا هالسمك احنا الشعب المسكين كل واحد بيلطشنا من جهة التجار الكبار بيستغلونا بالاسعار، والمتنفذين بستغلونا بالامتيازات والهوامير الكبار بيبلعونا... آه يا بابا فعلاً مسكين هالسمك الصغير مسكين!!

-طيب بابا ما في قوانين في البحر ما تخلي السمك الكبير  يعتدي على السمك الصغير

-بابا قوانين البحر الليذ  . حطها هما السمكات الكبار ووضعوها علشان تسهل إلهم ياكلوا السمك الصغير تحت ظل القانون...

جوليا، شو رأيك نعمل حوض سمك صغير في البيت وبلاش نحكي عن هاي المواضيع لإنها وجعت قلبي

-موافقة بس بشرط

-شو

-ما بنجيب سمك كبير، بس بنجيب سمك صغير وبنخليه يعيش بأمان وسلام وراحة بال.

-اتفقنا

*رئيس جمعية الكتاب الإلكترونيين الأردنيين