فجّر محمد عبد الوهاب، شقيق الفنانة شيرين عبدالوهاب، مفاجأة من العيار الثقيل حول حالة شقيقته، بعد تداول أخبار عن نقلها الى منزل الفنانة زينة بسيارة إسعاف، مشيراً الى أن كل ما كُتب في الفترة الأخيرة عن حالة شيرين أخبار مغلوطة وغير صحيحة، مؤكداً أن الهدف منها هو التجارة الإعلامية وجذب الانتباه لا أكثر.

وكتب شقيق شيرين عبد الوهاب عبر حسابه الخاص في "فيسبوك" قائلاً: "أقسم بالله العظيم 90٪ من الأخبار مغلوطة وغير صحيحة، والناس اللي بتاجر بيها في البرامج والمداخلات ولا في مجموعة فنانين اتّحدوا وكل الهري ده كله غلط دي ناس عايزة لقطة ورتش مش أكتر محدّش ساعد غير اتنين أحمد سعد وزينه، بس ومحمود الليثي كان كل يوم عندها".

وأضاف: "إحنا بقى بعيد ليه عشان اللي انتو شايفينه ده حياتها عبارة عن حرب إحنا لما ادخلنا من أربع سنين اتقال علينا إيه إننا نهبناها ومستفيدين وناس وحشين طيب ماشي نجحوا إنهم يبوّظوا علاجها مين بقى دول طليقها والمحامي بتاعها وسارة الطبّاخ وأربعين صحفي تحت المستشفى تمام بعدنا ونجحوا في إن علاجها يبوظ".

وتابع: "حلو بعد أربع سنين ناس تانية غيرنا أهم فنانين ومعروفين وملهمش مصلحة اللي بيدور معاهم جابوا كل تاريخهم القديم ودول كذا وكذا وإزاي دول اللي يعالجوها مين بقى اللي ليه مصلحة يطلع يشوّه الناس دي زي ما شوّهنا من قبلهم واللي طالع يقول مش صح إنها تروح بيت صحبتها كله بيتاجر عرفت منين حضرتك إنها راحت عندها ومتأكد أوي".

وأردف محمد عبد الوهاب بالقول: "موضوع بقى عربية الإسعاف... زينة عدّت عليها يوم قالتلها أنا حاسة إني تعبانة، قالتلها المستشفى الجوي أهي قريبة يلا بينا، راحت واطّمنت عليها وهما هناك الدكاترة طلبت منظار خدت بينج وماكنتش قادرة تركب العربية فخدوها بسيارة إسعاف لحد بيتها دي كل الحكاية... الصحافيين بتوعنا المحترمين بقى عرفوا إزاي علشان بيجنّدوا ممرضين في معظم المستشفيات والمحاكم والنيابات تشوف حد مشهور عرفني بس وليك الحلاوة بس وكله بقى كتب وألّف على مزاجه".

واختتم منشوره قائلاً: "ليه بقى تحديداً الاتنين دول واقفين جنبها بجد عشان دول عِشرة العمر نعرف بعض من قبل ما حد فيهم يبقى معروف من زمان عِشره وستر وغطا وحاجات كتير أوي، أي حد تاني بقى كله بيتاجر بيها الناس دي بقى دلوقتي هتزعل مني جداً علشان مكنوش عايزين حد يعرف أي حاجة عشان ميتفهموش غلط، بس اللي حصل من أهل الشر إيه على الناس دي حملة ممولة على كل المنصات مدفوعة إن الناس دي وحشة مينفعش دول يبقوا جمبها دي كل الحكاية أي حاجة برّة الكلام ده أقسم بالله هري".