نيفين العياصرة 

بالأمس كنت أجلس مع عدة شخصيات سياسية لفت انتباهي سؤال من صحفي:" هل حاربنا الفساد حقًا؟"، ضحكت بيني وبين نفسي قلت يا رجل نحن نحارب الفساد بنفس الطريقة اللي بنحارب فيها السمنة واحنا قاعدين نطلب صحن منسف مضاعف،

نكتب قوانين ،ونحضر مؤتمرات ،ونعلق يافطات، ونوزع ابتسامات ونرجع على بيوتنا نفتح ملف واسطة ونوقع معاملة مشبوهة.

احنا ملوك التصريحات، فرسان الميكروفونات بس أول ما ينط ملف ثقيل، بنقول الموضوع قيد الدراسة والنتائج بعد حين!. 

والمواطن العادي المسكين يروح على دائرة حكومية يكتشف انه الفساد قاعد على الكرسي قبله وبيطلب قهوة. 

الفساد بالنسبة النا مش أسماء أشخاص بدنا نشيلهم ونجيب غيرهم، هو نفس النص يتكرر  ونفس المسرحية تتغير الوجوه والجمهور يتفرج وهو فاهم القصة من المشهد الأول. 

الفساد مش وحش غريب جاي من خارج الحدود، الفساد هو احنا لما نغش ونبرر ونقول معلش الدنيا هيك!. 

هو المسؤول اللي بنسميه شاطر لأنه عرف يسرق ويظل واقف،وهو المواطن اللي بيفتخر أنه مشى معاملة بالواسطة ويعتبرها بطولة. 

هل حاربنا الفساد؟ الجواب صريح!:لأ .. إحنا بس دربنا حالنا نعمل ضجة إعلامية ونوزع ابتسامات ونكتب عالفيسبوك محاربة الفساد مستمرة، بينما الفساد نفسه قاعد بضحك علينا وبحجز كرسي بالصف الأول.