يوميات مدير مدرسة حلقة (18)
جفرا نيوز - بقلم؛ الدكتور محمد أبوعمارة
-دكتور أم جميل بدها ياك بموضوع مهم جدًا
-مين أم جميل ؟
-أم جميل يا دكتور
-آه أم جميل ،اعتذري منها مش فاضي
وبعد عدة دقائق تدخل السكرتيرة
- دكتور أم جميل بدها ياك بموضوع مهم جدًا جداً...
-مين أم جميل ؟
-أم جميل يا دكتور
-آه أم جميل ،اعتذري منها مش فاضي
وبعد عدة دقائق تدخل مرة أخرى السكرتيرة
- دكتور أم جميل بدها ياك بموضوع مهم جدًا جداً، وبحكي انه الموضوع كبيرة كثير
- مين أم جميل ؟
-أم جميل يا دكتور
-آه جننتني خليها تدخل نشوف شو بدها
وتدخل أم جميل وهي تتحدث .....
-والله يا دكتور اللي بصير في غرفة المعلمات غلط وعيب وبسيء للمدرسة وإلك شخصياً ولا يليق بمدرسة متل مدرستنا
ولا ببلد متل بلدنا ولابـ...
-يا بنت الحلال اصبري ،شوي شوي ،شو مالك؟! شو في؟! شو اللي بدك إياه!!
-يا دكتور المعلمات داقات ببعض وصراخهن واصل لآخر الدنيا!!
-طيب شو السبب، ليش زعلانين!! او متقاتلين؟
-يا سيدي...
-سيدي!!! هاز بسريرك مأنا... ما إنت قد أمي حسبي الله عليكِ ....إوعك تعيدي هاي العبارة !!
-عفواً دكتور عفواً!!
-تفضلِ يا ستي...
-ستي لأكون هازة أنا بسريرك !!
-عفواً منك مش قصدي!
-ولا أنا كان قصدي!!
-طيب شو الموضوع!!
-دكتور مس سعاد زعلانة من مس مها!!
-ليش؟؟!
-ماهو هادا السؤال اللي أنا سالته لمس سعاد!!
-طيب شو جاوبتك؟
-حكتلي إسأليها هيه!
-مين هي؟؟
-مالك دكتور أكيد مس مها!!
-طيب وسألتيها!!
-آه سألتها
-طيب شو مالها ؟
-حكتلي كان حكتلك هي ليش جاي تسأليني أنا؟!!
-لا حول ولا قوة إلا بالله -لعيتي مرارتي- طيب وشو صار بعدين؟؟؟
-ظليت أفكر وأفكر كيف بدي أعرف شو سبب الخلاف!!
-طيب إنت ليش مركزة كثير مع المعلمات خليك في شغلك أحسنلك!!
-ما هو هاد يا دكتور جزء من شغلي!!
-طيب وبعدين شو صار!!
-رحت لغرفة المعلمات وسألت أولاً مس سهاد شو صار بين مس سعاد ومس مها فحكتلي سهاد إنه الموضوع كبير ومرتبط بالشعب اللي بيدرسوهاوفي كمان مواضيع خاصة بينهم ما بقدر أحكيلك ياها بس إذا حابة تعرفي أكثر أسألي مس رنا!!
-خلص ما تكملي موضوعك .
الموضوع كله مش مهم وما تتدخلي بالمعلمات وماإلك فيهم!!
-لأ دكتور الموضوع مهم وشاغل بالي!!
-طيب رحتي سألتي رنا طبعا!!
-لأ دكتور مالك ! ما أنا ورنا ما بنحكي مع بعض من يوم ما افترت علي قدام مشرفة الطابق ليش هو أنا بنسى هذا اليوم – الله لا يوفقها- حسبي الله عليها ظلمتني أشوف فيك يوم يا رنا!
-ولك خلص!! خلص!!!
-عفواً عفواً دكتور أزعجتك!
-ازعجتيني جداً جداً!!!!
-خلص بوعدك اختصر قد ما بقدر...
-لا بلاش تختصري الحديث ، اختصريني أنا وبلاش كل الموضوع!!
-له يا دكتور، ولْ ليش متغير وبطلت تطيق الحكي معي؟؟
-لا حول ولا قوة إلا بالله، طيب وشو عملت مع رنا!!
-طبعاً ما فشرت إني أحكي معها!!
-ولا شو علمت!!
-أنا بعرف إنه حنين هي نص رنا الثاني وكاتمة أسرارها وبتحكيلها كل إشي فرحت عند حنين وسألتها، شو قصة سعاد ومها!!
-فحنين حكتلي...
-شو هو انت كمان وصلك الموضوع!!
-حكالها طبعاً، ما هم قطعوا بعض بالمدرسة فحكتلي: إسمعي سعاد ومها أصلاً درسوا مع بعض أيام ما كانوا صغار وكانوا بنات صف واحد!!
-أيوا
-ومن همي وصغار صاحبات وبينهم مواضيع مشتركة وبتعرفي بينهم...
-ما فهمت
-فهمك كفاية
-والله ما أنا فاهمة
-يا بنت الحلال ركزي معي يو مالك!
-فيا دكتور عملت حالي فاهمة وأنا مش فاهمة وحكتلها كملي ....كملت.. وبصراحة كل هاي التفاصيل بتقدري توخديها من روح قلبها لسعاد...
-مين روح قلبها لسعاد؟!
-واااال مش عارفة مين روح قلبها لسعاد!
-لا والله ما أنا عارفة
وهنا قلت أنا :
-يا بنت الحلال مين روح قلبها لسعاد وجعتي قلبي الله يوجع قلبك
-له يا دكتور ليش بتدعي علي،... الحق علي أنا بس!!
-ولك يلا اختصري مين روح قلبها لسعاد؟؟
-طلعت يا محفوظ السلامة (الاء) هي روح قلبها لسعاد!
-مين الاء؟!!
-الاء مشرفة المختبر!!
-آه.. ايوا عرفتها!! طيب وبعدين!!
وفجأة تدخل السكرتيرة.. دكتور مكتبي مليان في كتير مراجعين وأولياءأمور بدهم يقابلوك!!
-استني بس مقصوفة هالعمر تكمل القصة
-له يا دكتور أنا مقصوفة عمر، إذا بزعجك أو أخدت وقتك خلص بنكمل بعدين!!
-وين بعدين ! كملي هسه!!
-طيب يا دكتور مشان ما بدي أطول عليك رحت عند الاء وحكتلها من الاخر شو قصة سعاد ومها، فحكتلي
-ليش هو انت ما بتعرفي!!شو قصة ألاء !
-حكتلها لا والله ما بعرف
-حكتلي تخيلي ولا أنا والله كمان ما بعرف!!
وهنا قلت أنا : بالله شو ؟ كيف ما بتعرف كان أصريت عليها تتذكر
-والله يا دكتور ما حكت أي شي ومشان هيك جيتك يا دكتور لحتى تعرفلي شو قصة سعاد ومها لأنه أنا غلب حماري!!والفضول قتلني قلت بستغل نفوذك و........
-غلب حمارك!! أنا اللي راح اقص خبرك يا إم لسان وتهرب المراسلة ام جميل ويلحقها الدكتور وهو يتمتم سعاد.. مها.. امسكوا ام جميل!!
أمسكوا أم جميل
ثم هدأ الدكتور... وعاد إلى مكتبه وفكر :يا ألله كم نحن فضوليون وكم نضيع من أوقاتنا ونحن نتتبع الآخرين ونتطفل عليهم فلو أن أم جميل قضت هذا الوقت الذي بذلته في أي شيء آخر لأنجزت الكثير ولكن الفضول القاتل وعدم احترام خصوصية الآخر هي طبع الكثيرين !ونادى السكرتيرة التي يعح مكتبها بالمراجعين... سوزان!!
-تفضل دكتور
-بدي أسألك سؤال خاص
-تفضل دكتور
-بتعرفي شو اللي بين مس سعاد ومس مها!!
-دكتور بصراحة ماإلك إلاتسأل ام جميل!!