جفرا نيوز - تحدث الفنان المصري نضال الشافعي، عن ظهور أكثر من حالة مصابة بفيروس كورونا، بين نجوم الفن الذين حضروا مهرجان الجونة السينمائي، مشيرًا إلى أنه كان واحدًا من الفنانين الذين تواجدوا في حفل الختام.

وقال الشافعي في لقاء خاص مع موقع "فوشيا" على هامش حضوره مؤتمر مهرجان شرم الشيخ للمسرح الشبابي: "موضوع إصابات الفنانين بكورونا في الجونة مش زي الصورة المتصدرة خالص، إن ناس كتير اتصابت، أنا مشوفتش التفاصيل دي في المهرجان، ممكن يبقى في إصابات فعلا ووارد ده يحصل، بس مش كل اللي راحوا الجونة اتفيرسوا، وارد يكون في حالة أو اتنين أو 3 أو 4 بالكتير".

وأضاف: "أنا بصراحة مصادفتش حد جاتله الإصابة بشكل أو بآخر، والحمدلله عملت كل الاحتياطات وكنت من ضمن الناس الموجودين على الريد كاربت في المهرجان، يمكن محضرتش الافتتاح بس كنت موجود في الختام".

وأردف الشافعي: "المهرجان كان عامل كل الإجراءات الاحترازية بالاشتراك مع وزارة الصحة، كانوا عاملين مجهود رائع وخرافي، فمينفعش نهمل ده كله ونتكلم عن إصابة أو اثنين".

وأكمل: "أنا الحمدلله باكل وبشم وبدوق وزي الفل، الحمدلله فضل الله علينا كبير، أنا مش عايز أقلل من الجائحة، ولكن أتمنى إنها تعدي على خير، والكمامة دايما لابسها بس أنا قالعها دلوقتي علشان أعمل اللقاء".

وواصل حديثه قائلًا: "طالما كل واحد بيعمل اللي عليه تجاه نفسه وتجاه اللي حوليه أعتقد مش هيبقى فيه خوف، بنحاول على قدر الإمكان عجلة الإنتاج والإبداع والثقافة متتوقفش بشكل أو بآخر بسبب الجائحة".

واستطرد نضال: "أعتقد مصر من الدول اللي بيضرب بيها المثل إنها عرفت تتعامل مع الموجة الأولى بأكثر عقلانية وهدوءًا، مش بس على مستوى الفن، وأيضًا على مستوى الاقتصادي، موقعناش بشكل كبير لإننا موقفناش الحياة بنسبة 100%، وده شيء يحسب للجهات التنفيذية ووزارة الصحة، والحكومة بشكل عام".

وتابع: "إحنا كمصريين عندنا كم كبير من الوعي، الناس في بيوتها بيعملوا كل حاجة علشان يأمنوا نفسهم من كورونا، زي الكلور والكحول وكل إجراءات الوقاية".

وعن أعماله الفنية الجديدة في الدراما، قال: "في مسلسل (هجمة مرتدة) مع أحمد عز، وحاليا بصور مسلسل (يوم بليلة)، مع النجم أحمد رزق، وأدعو له بالشفاء لإن عنده كدمة في قدمه بسبب مشهد أكشن في التصوير وأتمنى يرجع في أسرع وقت بإذن الله".

يذكر أن أكثر من فنان وفنانة أعلنوا إصابتهم بفيروس كورونا، بعد مشاركتهم في الدورة الماضية من مهرجان الجونة، بينهم: على رشدي، وأحمد داوود، وسارة عبد الرحمن، وزينب غريب، وآسر ياسين.