جفرا نيوز - كشفت الفنانة المصرية لقاء سويدان، كواليس تراجعها عن قرار الاعتزال، الذي اتخذته منذ عام تقريبًا، مشيرة إلى أنها لم تستطع الابتعاد كليًا عن الفن.

وقالت سويدان في لقاء خاص مع موقع "فوشيا" على هامش حضورها مؤتمر مهرجان شرم الشيخ للمسرح الشبابي: "لما أخذت القرار ده كنت مقتنعة بيه جدا في وقتها، وكنت وصلت لدرجة من الامتلاء والزهق، مش هقدر أوصف الحالة بالظبط ومش عارفة إذا كان الناس هيفهموا الحالة اللي كنت فيها ولا لا، بس أنا اعتبرتها استراحة محارب، حاولت أبعد تمامًا عن التمثيل بس مقدرتش، أنا رجعت أمثل عشان المسرح".

وأضافت: "اتصلوا بي في المسرح قالوا لي في ورق مهم أوي هتحبي إنك تعمليه، والمسرح القومي ده مسرحي، بقالي 19 سنة عضوة في المسرح القومي، أول ما دخلت وعديت على خشبة المسرح، حسيت إن ده مكاني وبيتي وإن دي حياتي، قررت ساعتها إني لازم أرجع الفن".

وأكملت: "أنا سافرت درست دراما في دولة الإمارات 6 أشهر، بس أنا اعتزلت قبل ما أسافر بشهرين، لو مكنتش فنانة كنت هبقى مدرسة أطفال، بس مدرسة أطفال دراما، أنا كنت بدرس الدراما للأطفال من سن 9 سنوات تقريبًا، لحد 14 سنة، وكانت حاجة ممتعة جدًا".

وعن كيفية تعاملها مع جائحة "كورونا"، قالت الفنانة المصرية: "مش خايفة خالص من كورونا، منا بعمل مسرح وواخدة كل الإجراءات الاحترازية ولسة راجعة من مهرجان إسكندرية السينمائي لدول البحر المتوسط، بس ببقى حريصة إني متواجدش في أماكن كتير فيها تجمعات، لازم نعدي الأزمة بشكل فيه وعي ومناخدش الموضوع بهزار، ولازم نخاف على الآخرين أكتر من خوفنا على نفسنا".

وعن ما تتمنى تحقيقه في العام المقبل، قالت: "نفسي أحقق حاجات كتير أوي، عندي أحلام خاصة في المسرح نفسي أعملها، مشروعات مختلفة نفسي أحققها، عاوزة أشتغل على نفسي فنيا ومعنويا، ونفسي السنة الجاية بنتي تتخرج من المدرسة وتبقى آخر سنة ليها". يذكر أن الدورة الحالية من مهرجان المسرح الشبابي بشرم الشيخ، تحمل اسم الكاتب الراحل الدكتور "أحمد سخسوخ" وتتكون لجنة تحكيمها من الدكتور والكاتب سامي الجمعان من السعودية والدكتور والكاتب مفلح العدوان من الأردن والكاتب أيمن سلامة من مصر ومقرر ومنسق تلك اللجنة الناقدة داليا همام من مصر.