جفرا نيوز- دخلت باب المدرسة وإذ بجمهرة من المعلمين والطلبة وأولياء الأمور والظاهر أن هناك معركة تدور بين أطراف عديدة ولكن أحدها كما يبدو رجل كبير في السن اقتحمت الصفوف المتجمهرة "يا شباب لو سمحتم كل واحد على شغله" صرخت بالجموع التي انفضت بسرعة حال وصولي . وتحركت صوب الرجل كبير السن وقلت له: تفضل على مكتبي يا عمي وأنا بحل مشكلتك شو ما كانت... - مين انت؟! - أنا المدير... - مدير هاي المدرسة !! - نعم تفضل معاي!! - إنت بتعرف مع مين بتتعامل، ولا ما بتحترم حالك ولا بتحترم الناس... - له يا شيخ معاذ الله، ليش بتحكي هيك !! - لإنك ما عندك كبير وما بتعرف تتعامل مع ولاد الناس - له يا عمو، تفضل على مكتبي حتى نحكي!! - وشو عليه، بتفضل!! وبصعوبة قدت هذا الرجل إلى مكتبي لأستهل معه الحديث - شو بتحب تشرب... - والله لو بصحلي غير أشرب دمك!! - اللهم طولك يا روح، يا رجل أنت ليش معصب لهلدرجة شو مالك علي!! - يا رجل أنا مستغرب كيف واحد مثلك ما بحترم الناس بصير مدير!! - أنا بحترم كل الناس وصرت مدير بخبرتي وشهاداتي!! تفضل شو موضوعك!! - لأ، قوم اضربني كمان،،، فعلاً اللي استحوا ماتوا!! - طيب يا عمي... - لا تحكي عمي,,, عمى الدبب!!! أنا أصغر منك بس الزمن عجب علي مش مثلك إبن دلال!! - على فكرة اسم امي مش دلال!! - دلال قصدي رفاهية يا أبو جهل! - تفضل يا سيد عفواً شو اسمك!! - أبو أحمد - تفضل يا أبا أحمد!! أنت ولي أمر أي طالب!! - لأ مش ولي أمر ولا طالب.. - ولا عم أي طالب!!! - ولا عم أي طالب! - طيب خال أي طالب؟! - يخلخل عظامك ولا خال حد . أصلاً ما ليش خوات !! - طيب جار مين ؟ولا مين بقربلك من الطلاب!! - لا يا حبيبي كل قرايبي – مسخمين- و - مسخمطين- ما فيهم حد بيقدر يدفع أقساط مدرستك فبالله العظيم ما بعرف ولا طالب من كل طلاب مدرستك!! - طيب يا رجل إنت جاي معصب ليش؟ وبخصوص أي موضوع!! - انا جاي اشوف كيف انت بتبهدل إبني!! - يا رجل ما انت حكيتلي إنه ما إلك اولاد عنا بالمدرسة ولا قرايب ولا حد!! - انت على فكره مدير من القله؟ يا رجل دخيل على حبايبك خليني اكمل كلامي!! - تفضل يا سيد أبو احمد كمل كلامك !! - يا رجل إحنا ولاد عشاير وحمايل والله لما أدخل عند وزير التربية إنه بيوقف احتراماً إلي ، يا رجل وزير الداخلية لما شافني وقف وباس على راسي ووزير المالية انحنى احترامًا الي . -طبعًا وزير المالية بده ينحنيلك ما انت وانا اللي بندفع ميزانيته -شفت انك قليل حيًا وناكر للمعروف اه ويا ويلي واوف منك.... بدك تدخلنا بالخيط كمان وحضرتك مش مستنظف تحكي معانا. - يا رجل احكي انطق تفضل - لا حول ولا قوة إلا بالله، يا رجل أنا تجوزت وعمري ستة عشر سنة بنت عمي وظليت معها خمس سنين بدون خلفة لغاية ما الناس أكلت وجهي وما خلينا ولا شيخ ولا راهب ولا حجاب الا ورحناله وعلى الفاضي... - وبعدين يا أبو أحمد  - يا زلمة لا تقاطعني!! - تفضل... - وبعديها طلقت بنت عمي وتجوزت بنت أبو صبحي الخياط، كانت بنت مرتبة وعاقلة وكمان حلوه كثير.. - أيون... - شو أيون... يعني لتكون مش عاجبتك !! - يا رجل هو أنا عمري شفتها!! - لا احترم حالك لو سمحت!! - بتؤمر!! - وبالفعل كانت زوجة صالحة ورائعة ومحترمة ولكن بردوا للأسف ظلينا ثلاث سنين بدون خلفة وأنت عارف كل الناس فضحوني وصرت حديث العائلة ! - طيب وبعدين، ليش ما رحتوا على طبيب؟ - يا رجل هو أنت فكرك كان في اطباء في أيامنا!! يا رجل كنا بنولد عند الداية، والتمرجي والحلاق هما اللي بوصفولنا كل الأدوية!  - صحيح والله نسيت اعذرني!  - المهم يا حفيظ السلامة زنت علي رحمة والدتي وخلتني اطلقها.. - له له له لا حول ولا قوة إلا بالله!! - مع إني حبيتها كثير والله بنت أبو صبحي بعدها جابولي بنت عبده الحلاق وكانت اسمه عبده مش دلع لعبدالله هو اسمه عبده لانه كان عندهم جار من مصر اسمه عبده وكان محترم فأبوه سماه على اسمه وكان هذا الاسم غريب  على بلدنا زمان وكانت بنته محترمه جداً بس بصراحة مش حلوه والمهم !! - لا تحكيلي ما خلفت كمان!! - يا رجل فعلاً انك انسان عجول وبصلتك محروقة هسه والله ما بكملك القصة!! - لا يا حاج أرجوك كمل كمل!! - طيب ما تقاطعني بالمره وبتقعد ساكت!! - ماشي.. - اتفقنا، المهم رحت أنا وياها للمستورة عمره ودعينا ربنا باخلاص والمهم رجعنا وربنا وفق وحملت المره!! - ياااااه الحمد لله صبرت ونلت!! - يا رجل أنت ما بتفهم مش حكيتلك ما تقاطعني .. - أسف ,, أسف... - مهو من عينك وعين الناس سقطت المره وهي بالشهر الثالث وما اكتمل الحمل وظلينا بعدها أربع سنين بدون خلفة ولا حمل.
ونظر إلي .......وكنت أضع يدي على فمي دون أن أنطق وقال لي: - شو شايفك انخرست!! ولا تعليق!! - مهو انت حكيتلي ما أحكي ولا كلمة يا حاج. - طيب ما شاء الله عنك صاير تفهم، خليني اخلص قصتي مشان احكيلك الاشي المهم اللي أنا جاي علشانه  -ماشي يا حج -تجوزت كمان وحدة أرمله (ام السعيد)وكان عندها ثلاث أولاد يعني بصراحة مجربة وحكيت هون لازم أركز لأنه إذا هاي المره ما خلفت رح انفضح ويطلع العيب مني أنا.  وسبحان الله يا مدير فعلاً من أول شهر حملت وضليت جنبها (الله واسم الله) (ودادا...دادا)لحد ما وصلت للشهر الثامن و .. - لا تحكيلي ماتت، ولا مات الجنين!! لا ارجوك مش معقول شو حظك معثر !! - فعلاً انك وجه شؤم وما بتفهم مش حكيتلك ما تقاطعني، خلص بديش أكملك القصة!! - بالله عليك تكمل!! استحلفك بالله تكمل -لا مش مكمل -خلص وعد إني انخرس مش معقول ما تكملي القصة. - طيب يا سيدي وبحمدالله ورضا الوالدين إجانا (احمد) ابني الوحيد!! - الحمد لله والله يا زلمة....الحمد لله ...يا ما انت كريم يا رب والله اني فرحت بأحمد أكثر من ولادي!! - فرحت بأحمد يا كذاب!! - لو سمحت ليش طول اللسان!! - لو فرحت بأحمد كان ما بتعطجيه استجواب تخيل (أحمد) اللي اجاني بعد هالعمر وهالغلبة وربيته ثانية بثانية ودرسته بأحسن المدارس الحكوميةلحد ما تخرج من الجامعة واشتغل اللي ما عمره ابن مره حكاله تلت التلاته كم .....مشان يجي واحد متلك يعطيه استجواب!! - أنا، اعطيته استجواب !! ليش مين احمد ابنك!! - احمد معلم العربي... - آآآه هو أنت ولي أمر استاذ بشتغل بمدرستنا اسمه  أحمد؟ -يعني عامل حالك مش عارفه؟ -لا والله ماني عارفه، طيب وشو المشكلة إذا اعطيته استجواب ؟الاستجواب مش اتهام الاستجواب سؤال عن شيء معين!! - وما لقيت إلا أحمد اللي تسأله عن شيء معين!!!! يا رجل اتقي الله . احمد هو محصلة أربع نسوان جاي إنت تبهدله وتهزأه وتقلل قيمته!! - لا يا عمي بالعكس أحمد استاذ كويس وواعد وإله مستقبل وأنا هلا بناديه وبطيب خاطره كرمالك، يا ديمه لو سمحتِ ناديلي الأستاذ أحمد أستاذ اللغة العربية!! - عفواً دكتور إحنا ما عندنا استاذ اسمه أحمد !! - كيف يعني!! - على قوائمنا ما في استاذ أسمه أحمد!! - لو سمحت يا حج هو ابنك اسمه شو!! - استاذ احمد عبدالسلام محمد صبحي... - اتأكدي يا ديمه...وتذهب ديمة وتعود لتخبرني: - والله يا دكتور ما في استاذ أسمه أحمد... - طيب يا حج ... وين راح الحج!! ديمة كان في رجل كبير في السن قاعد هون وين راح!! اه شفته دكتور -وين راح - هلأ دكتور طلع بسرعه!! - من وين ... - من هون... - حج حج!!! واختفى الحاج حينما أدرك أن ابنه لا يعمل في هذه المدرسة وأنه أتى إلى العنوان الخطأ أما أنا شخصياً فقد استمتعت بقصة الحاج أبو أحمد وبالنسبة للبهدله... عادي ... عادي..بس كان نفسي أسأله: ليش ما علمت احمد يطالب بحقه او يعترض بدون ما يجيب ولي أمره؟؟ بس للأسف اختفى الحاج ....