جفرا نيوز-  أكد الناطق الاعلامي في مديرية الأمن العام، المقدم عامر السرطاوي، أن الحديث عن تسليم رقيب سير "دفتر المخالفات" الخاص به لصاحب كراج في اربد ليقوم بتحرير المخالفات للمركبات التي لا تصطف بداخله هو عار عن الصحة.
وأضاف السرطاوي إن الأجهزة الأمنية قامت بتشكيل لجنة تحقيق حول الواقعة للتأكد من صحة رواية المواطن "المخالف" والتي نشرها عبر صفحته على موقع التواصل الاجتماعي فيسبوك، حيث جرى استدعاء صاحب الشكوى وبعد التحقيق تبيّن أن روايته غير دقيقة وأن المخالفة حررت بشكل أصولي.
وفي التفاصيل، أوضح السرطاوي أن صاحب المحل تقدم بشكوى عبر الهاتف لغرفة العمليات بوجود مركبة تقف أمام محله بشكل مخالف، حيث جرى التواصل مع رقيب السير وابلاغه بالتوجه إلى الموقع، ليتبين صحة الشكوى وقام بتحرير المخالفة بخطّ يده.
وقال السرطاوي إن الأمن قام بتحويل ملف القضية إلى المحكمة للفصل بها ومحاسبة المذنبين.

وتاليا ما نشره المواطن:
واقعه حدثت في اربد فضفضه وفش غل
بعنوان
" رقيب السير " اليوم كنت بإربد ورحت على الحسبه لإجيب غرض دخلت الحسبه بسيارتي كوني ما بدي أتأخر قلت خليني أوقف بدخله من هالدخلات
قبل ما أنزل من السيارة أجى لعندي شب بالثلاثينات من عمره (الله لا يكبره) وإلا بحكيلي لا توقف هون وقف بالكراج
حكيتله بدي انزل دقيقتين مش مستاهلها ادخلها على الكراج
حاول معي ما رديت عليه
حكالي أنا بورجيك !!! شوف شو بدك تدفع عشان توفر ليره (إجرة الكراج)   طلع هو صاحب الكراج !!!
الصراحه نزلت من السياره وأنا خايف عليها
قلت بدي ابعد شوي وأشوف شو بده يعمل ، خفت يبنشر عجل ، او يخشطها او يعمل شي بالسياره .
المهم ابعدت عنه بمسافة مسير خمس دقايق وأنا اراقب فيه شو بده يعمل
وإلا نفس الشب بيمشي إتجاه السياره وحط شي على الزجاج الأمامي .
إرجعت بسرعه على السيارة لقيت مخالفه سير على المساحات حطها الشب المدني صاحب الكراج !!!!  
بحكيله شو هاي ؟؟ حكالي بدك توفر دينار بتدفع مخالفه عشرين دينار
حكيتله طيب وين الشرطي إلي خالفني ؟؟ ما أنا براقب بالسياره وما في شرطي أجى وانت الي حطيت المخالفه ؟؟
حكالي : الشرطي أجى خالفك وكان مستعجل اعطاني المخالفه ورجع على دوار وصفي التل
هون طار عقلي وإتأكدت إنه دفتر مخالفات السير موجود مع صاحب الكراج !!!
شغلت السياره ورحت على دوار وصفي التل وصفيتها بنص الطريق وانزلت لقيت ثلاث رقباء سير
سألت عن (...) محرر المخالفه طلع واحد من الثلاث
حكيتله كيف بتخالفني وانت هون ومش شايف السياره وبتخلي صاحب الكراج يعلق المخالفه على مساحات السياره ؟؟
وما في إشارة ممنوع الوقوف ؟؟
حكالي السياره عليها شكوى وتبليغ من العمليات
طبعا كل هاد خلال الخمس دقايق
طلبت منه يورجيني دفتر المخالفات ويورجيني مسودة المخالفه!!   رفض حكيتله دفتر المخالفات مش معك والي كتبلي المخالفه صاحب الكراج
إرتبك الشرطي الشريف المحترم
وزملائه صاروا يغيروا بالموضوع !!!
طيب أنا كمواطن
مين إلي ينصفني ؟؟ مين يرجعلي حقي ؟؟ مين يحاسب الشرطي ؟؟ مين يحاسب صاحب الكراج؟؟
* إقسم بالله بينزعوا الولاء والإنتماء من قلب المواطن * إقسم بالله بلدنا على حافة الهاويه
* إقسم بالله لن يبقى الأردن بخير إذا بقي على هذا
* إقسم بالله لا عتب على الحكومة ما دام الشعب هيك
اسم ورقم الشرطي
(.....)
موجودات على قسيمة المخالفه
حسبي الله ونعم الوكيل بهالرقيب
الرجاء مشاركة المنشور ليوصل للمسوؤلين لإنه إذا إنتشر الفساد بين أفراد الأمن هلكنا جميعاااااا